AI and my blog

不如又講啲特別啲嘅嘢，AI。

先至聲明，我唔係咩AI高手，亦冇用過好多工具。但就算只係免費嘅AI工具，都已經可以做好高模仿水平。

以Sam哥我呢個寫咗10幾年嘅wine blog為例，經過我嘅測試同訓練之下，佢已經做到我80%能力，包括我嘅用詞、段落同風格。而家幾乎已經可以求其掉個酒名俾佢，寫到連我自己都分唔到真假。

That’s so sad。

更加唔好話更強大嘅付費model，更有自主計劃同學習能力嘅agentic AI，可以自己規劃同搵料定時出post覆comment。所以除咗blog，其他媒體亦一樣有被取代嘅風險。

當然，我唔會用AI寫文，最多用嚟蒐集資料。原因唔係佢唔得 (佢係好得，有幾得？我attach幾張圖，我今晚飲嘅Burg as example)。

而係，第一，寫wine blog本來就係我興趣，我寫嚟係滿足自己而寫，亦都令自己有得着，有滿足感，而唔係為寫而寫。第二，假設AI已經可以寫到同我一樣，但佢始終冇飲過，冇嗰種感受，亦冇我哋嗰種天馬行空嘅想像，更加冇我以前累積落嚟嘅經驗。

紅酒，本來就係”人”嘅嘢。

不過，AI is still evolving。